News

එක්සත් ජාතික පක්ෂයේ ජනාධිපති අපේක්ෂකයා කරූ ජයසූරිය ද ?

සටහන | කාවින්ද ගමගේ

එළඹෙන ජනපතිවරණයට තමන් ඉදිරිපතත් වන්නේ නම් එය එක්සත් ජාතික පක්ෂයේ ව්‍යවස්ථාව අනුව සිදුකරන බවත් , එය නිශ්චිත කාලසීමාවක් වෙනුවෙන් කරනු ලබන කැපකිරීමක් පමණක් බවත් කථානායක කරු ජයසූරිය මහතා නිවේදනයක් නිකුත් කරමින් ප්‍රකාශ කළා.

ඒ මහතා මේ බව සඳහන් කළේ කතානායක කාර්‍යාලයේ ලිපි දාතමින් යුතුව මාධ්‍ය වෙත නිකුත් කරන ලද ලිපියක් මඟිනි. මෙහිදී ඒ මහතා අවධාරණය කර ඇත්තේ, තමන් ජනාධිපතිවරණය ජයග්‍රහණය කරන්නේ නම් නියත වශයෙන්ම විධායක ජනාධිපති ධූරයද ඒ සමඟම අහෝසි කර දමන බවයි.

කථානායක කාර්යාලයේ නිවේදනය පහතින් :

“ පසුගිය සති කිහිපය තුළ ගෞරවනීය නායක හිමිවරු ඇතුළු මහා සංඝරත්නය සහ අනෙකුත් පුජ්‍ය ප්‍රසාදීන් වහන්සේලා, විවිධ සිවිල් සංවිධාන ප්‍රධානීන්, විශ්වවිද්‍යාල ආචාර්යවරු හා විවිධ ක්ෂේත්‍රවල  බුද්ධිමතුන්, වෘත්තිකයන්, තරුණ සංවිධාන නියෝජිතයින් මෙන්ම දේශපාලන ක්‍රියාකාරින්ද  විවිධාකාරයෙන් මා ඇමතුහ.

ඇතැම් පිරිස් පුද්ගලිකව පැමිණ මා හමුවු අතර තවත් අය දුරකථනයෙන් අමතමින් හා ප්‍රසිද්ධ ප්‍රවෘත්ති සාකච්ඡාවන් පවත්වමින්ද මාගෙන් ඉල්ලා සිටියේ සුවිශේෂි කරුණු කිහිපයක් වෙනුවෙන් ජනාධිපතිවරණයට අපේක්ෂකයෙකු ලෙස  ඉදිරිපත් වන ලෙසය.

එම සියලු පාර්ශවයන් ඉදිරිපත් කළ  පොදු කරුණ නම්, රට තුළ ප්‍රජාතන්ත්‍රවාදය ආරක්ෂා කිරිමත්, පවතින දේශපාලන ව්‍යාකූලත්වය සමනය කර ශිෂ්ඨ සම්පන්න සත් පුරුෂ පාලනයක් ස්ථාපිත කිරිමත්  සඳහා විශ්වාසනීය නායකත්වයක් රටට අත්‍යාවශ්‍ය හෙයින්,  තමන්  එම ඉල්ලිම  ඉදිරිපත්  කරන බවයි.

පළමුවෙන්ම  මා කෙරෙහි එවන් විශ්වාසයක් රැඳවීම පිළිබඳව පුජ්‍ය පක්ෂය ඇතුළු අනෙකුත් සියලු පාර්ශවයන්ට මාගේ කෘතවේදිත්වය පිරිනමමි.

කෙසේ වුවද,  ජනාධිපතිවරණයට ඉදිරිපත් වන ලෙස ලැබී ඇති කවර  ඉල්ලිමක් වුවද මා හට සලකා බැලිය හැක්කේ, “ 1995 වසරේ සිට අප අඛණ්ඩව පෙනී සිටි විධායක  ජනාධිපති ධූරය අහෝසි කරලීමේ පරමාර්ථය මුඛ්‍ය අරමුණ කොටගත් දේශපාලන බලවේග සමඟ එක්ව  පමණි.

එමෙන්ම 17 වන සංශෝධනය මඟින් ඉදිරිපත් කරන ලදුව 19 වන සංශෝධනය මඟින් තහවුරු කළ  දියුණු  ප්‍රශස්ත ප්‍රජාතන්ත්‍රවාදි ප්‍රතිසංස්කරණ වෙනුවෙන් පෙනී සිටින පාර්ශවයන් සමඟ පමණි.

එය දියුණු  ප්‍රජාතන්ත්‍රවාදයක්  සහිත  ආර්ථික හා සදාචාරාත්මක වශයෙන්  ශක්තිමත්  සුරක්ෂිත දේශයක් උදෙසා පදනම සැකසීම පිණිස  යම් නිශ්චිත සීමිත කාලයක්  සඳහා කරනු ලබන කැපවීමක් මිස කිසිවිටකත් ජනාධිපති තනතුර අපේක්ෂාවෙන්  කරන මැදහත්විමක් නොවන බවද අවධාරණය ‍කරමි.

කෙසේ නමුත් එක්සත් ජාතික පෙරමුණ ප්‍රධාන කොටගත්  පාර්ශවයන් නියෝජනය කරමින් එලෙස ඉදිරිපත් වන්නේ නම් එය පක්ෂයෙහි ව්‍යවස්ථාවට අනුකූලව සියලු පාර්ශවයන්ගේ ආශිර්වාදය ද සහිතව සිදුවිය යුතු බව මාගේ හැඟීමයි.. ”

අදාල ලිපිය
Tags

Leave a Reply

Your email address will not be published. Required fields are marked *

5 × one =

Back to top button
Close